མངའ་བདག་རྒྱལ་པོ་ལ་བསྟོད་ཚིག་དམ་ཚིག་མཆོད་པ།

མཆོད་བརྗོད།

༆ གྲུ་འཛིན་གནས་སུ་འབུམ་ཚོགས་འཁོར་གྱིས་བསྐོར།། ཕྱག་ན་པད་མ་ཕྲེང་བ་ནོར་བུ་བསྣམས།།

    འགྲོ་དྲུག་རྣམས་ལ་གང་འདོད་སྟེར་བ་ཡི།། བཙུན་པ་སྤྱན་རས་གཟིགས་ལ་ཕྱག་འཚལ་ལོ།།

ངོ་སྤྲོད།

ང་བཅས་ར་འབྲུག་གི་སྤྱི་ནོར་དམ་པ་དཔལ་མི་དབང་མངའ་བདག་འབྲུག་རྒྱལ་ལྔ་པ་མཆོག་གི་མཛད་བྱ་བཟང་པོ་ཚུ་ལུ་བསམ་སྟེ་རྒྱལ་ཁབ་ནང་ལུ་ཞི་བདེ་དང་དགའ་སྐྱིད་ཚུ་ཡོད་ལུགས་ལུ་གཞི་བཞག་སྟེ་བསྟོད་རྩོམ་ཐུང་ཀུ་ཅིག་ཕུལ་ནི་ཨིན། རྩོམ་འདི་གིས་སྤྱི་བཏང་ང་བཅས་འབྲུག་གི་རྒྱལཔོ་དང་རྒྱལ་ཁབ་མི་སེར་ཚུ་གི་སྐོལ་ལས་ཧ་གོ་ཚུགས་ནིའི་རེ་བ་སྦོམ་ཡོད་ཟེར་ཞུ་ནི་ཨིན།

༼བསྟོད་ཚིག་དམ་ཚིག་མཆོད་པ།༽

ལྷོ་ཕྱོགས་འཛམ་བུ་གླིང་གི་ས་འདི་ནང་།། རྒྱལ་ཁབ་བརྒྱ་དང་སྟོང་སྦེ་ཡོད་པའི་སྦུག།

དགའ་སྐྱིད་ཉི་མ་ཤར་བའི་ལྷ་གཡུས་བཟུམ།། དཔལ་ལྡན་འབྲུག་པའི་རྒྱལ་ཁབ་ཆགས་ཏེ་ཡོད།།

འབྲུག་སྨན་ལྗོངས་ཡངས་པའི་རྒྱལ་ཁབ་འདི།། ཕྱི་དགྲ་ཡི་ཕོགས་ལས་རྣམས་པར་རྒྱས།།

ནང་སངས་རྒྱས་བསྟན་པ་དར་ཤིང་རྒྱས།། འབངས་བདེ་སྐྱིད་ལོངས་སྤྱོད་་ཕུན་སུམ་ཚོགས།།

ཕྱི་སྒང་རི་ཚུ་གིས་བཅའ་རིས་སྒྲིག། ནང་དྲི་ཞིམ་ལྡན་པའི་ལྗོན་ཤིང་འཁྲུངས།།

ཕྱི་མི་གི་བལྟ་ཚེ་མཛེས་པས་ལོ།། ནང་རང་གི་བལྟ་རུང་མཇའ་མི་མཇའ།།

གཞན་རྒྱལ་ཁབ་འདྲ་བའི་སྟོབས་ཤུགས་མེད།། ཡངན་རྒྱལ་ཁབ་ཕྱུག་པའི་བང་མཛོད་མེད།།

ཨའེ་ཨིན་རུང་འདི་ལས་ལྷག་པའི་ནོར།། དཔལ་ཆོས་རྒྱལ་མི་དབང་རྒྱལ་པོ་ཨིན།།

ཡབ་འཇིགས་མེད་སེང་གེ་དབང་ཕྱུག་དང་།། ཡུམ་ཨ་ཞེ་ཚེ་རིང་དབྱངས་སྒྲོན་ལས།།

སྲས་འཇིགས་མེད་གེ་སར་རྣམ་རྒྱལ་མཆོག། སྐུ་འཁྲུངས་ཏེ་འབྲུག་མི་སྐལ་བ་བཟང་།།

དཔལ་འབྲུག་གི་རྒྱལ་ཁབ་དགའ་མི་དགའ།། དགའཝ་སྐྱིད་པའི་ཉི་མ་ཤར་ཏེ་ཡོད།།

འབྲུག་སྨན་ལྗོངས་ལྷ་ཡི་ཞིང་ཁམས་ནང་།། རིགས་ལྷ་ཡི་གདུང་ལས་སྐུ་འཁྲུངས་ནུག།

འབྲུག་སྤྱི་ནོར་མི་དབང་མངའ་བདག་མཆོག། ཕྱི་རིག་པའི་གནས་ལུ་མཁས་པ་དང་།།

ནང་སྲིད་བྱུས་མཁས་ཤིང་བྱམས་སྐྱོང་ཆེ།། འཕགསཔ་སྤྱན་རས་གཟིགས་དང་དབྱེ་བ་མེད།།

ཐུགས་སྤྱན་གྱིས་མི་སེར་ཡོངས་ལུ་གཟིགས།། འབྲུག་མི་སེར་ཡོངས་ཀྱིས་མཐའ་དོན་ལུ།།

ཐུགས་དཀའ་ཚད་མེད་པར་ཕྱག་ལཱ་མཛད།། ངེའི་རྒྱལ་པོ་སྐྱིད་སྡུག་ཕ་མ་ཨིན།།

ལུང་བསྟན་གྱི་མི་དབང་མངའ་བདག་མཆོག། རྒྱལ་སྲིད་ཀྱི་འཁོར་ལོ་ཕྱག་ལུ་བཞེས།།

ཕྱི་རྒྱལ་ཁབ་གཞན་དང་མཐུན་ལམ་མཛད།། ནང་རྒྱལ་ཁབ་སྔར་ལས་དར་ཤིང་རྒྱས།།

ས་སྐྱོང་གི་མི་དབང་མངའ་ཞབས་མཆོག། སྐུ་ཞབས་ཀྱིས་རྒྱལ་ཁམས་བསྐོར་ཏེ་བྱོན།།

འབངས་མི་སེར་ཉམ་ཆུང་སྐྱིད་སྡུག་སེལ།། དཔལ་འབྲུག་གི་མི་སེར་དགའ་སྐྱིད་འཕེལ།།

མེ་ཏོག་ལེགས་པའི་པད་མའི་མདངས།། གཅིག་ཡང་མ་བཞག་དཔུང་དོ་བཟུམ།།

མདངས་ཅན་དྲི་མེད་བཞིན་འཛུམ་འདི།། བརྟན་ཀྱང་འཇལ་རུང་ངོམས་རྒྱུ་མེད།།

འབྲུག་གཡུས་དགའ་བའི་སྐྱེད་ཚལ་ལུ།། ཁྱེད་ཀྱི་ཐབས་རིག་གསར་པ་གིས།།

བཤད་སྒྲུབ་བསྟན་པ་སྤེལ་བ་ཡིས།། མུན་པ་སེལ་བའི་སྒྲོན་མེ་ཨིན།།

སྐུ་ཡི་མཛད་པ་ལྷུན་གྱིས་གྲུབ།། གསུང་ནི་ཐོགས་མེད་འཇམ་དཔལ་དབྱངས།།

ཐུགས་རིག་གཞན་གྱིས་འགྲན་ཟླ་མེད།། ཁྱེད་ནི་ཚངས་ལྷའི་མེ་ཏོག་འདྲ།།

རྒྱ་དང་འབྲུག་གི་མཐུན་འབྲེལ་འདི།། མ་འོངས་བུ་བརྒྱུད་ཚུ་གིས་དོན།།

སྔར་བ་ལྷག་སྟེ་བཙན་ཐབས་ལུ།། གཉིས་སྟོང་བདུན་ལུ་ཆིངས་ཡིག་མཛོད།།

རྒྱལ་ཁབ་མཐའ་ཟུར་ཚུ་གི་དོན།། གཉིས་སྟོང་དགུ་ཡི་ལོ་འདི་ནང་།།

རྒྱལ་ཡོངས་ས་འཇལ་བསྐྱར་ཞིབ་གནང་།། མི་སེར་ག་ར་བདེ་བར་བཀོད།།

ཆོས་རྒྱལ་བྱང་ཆུབ་སེམས་དཔའ་ཡིས།། དཀའ་སྡུག་མྱོང་བའི་མི་སེར་ལུ།།

སྐྱིད་སྡུག་ཟེར་བའི་གསལ་རས་གནང་།། མི་སོར་སྐྱིད་པའི་བྲོ་ཁྲབ་དོ།།

ཉེན་འཚུབས་ཆེ་བའི་རྐྱེན་ངན་ནང་།། རྒྱལ་ཁབ་མི་སེར་ཚུ་གི་དོན།།

སྤྱི་ལོ་གཉིས་སྟོང་བཅུ་གཅིག་ལོར།། བདེ་སྲུང་སྦྱོང་བསྡར་ལྟེ་བ་བཙུགས།།

མ་འོངས་རྒྱལ་ཁབ་རང་བཙན་ལུ།། ན་གཞོན་ཚུ་ལུ་བློ་གཏད་དེ།།

ཕྱི་རྒྱལ་ཚུ་ནང་བཏང་འདི་གིས།། ཡོན་ཏན་གཞི་རྒྱམ་ཡར་རྒྱས་གནང་།།

གཞན་ཁ་མེད་པའི་ལམ་སྲོལ་གཅིག། རྒྱལ་ཁབ་ནང་ལུ་མཛད་མི་འདི།།

སྙིང་རྗེ་རང་གཟུགས་ཨིན་པ་ལས།། བཙན་ཆས་ཡངས་ཆ་གནང་བ་ལེགས།།

དམངས་གཙོའི་རིང་ལུགས་བཙན་ཐབས་དང་།། མི་དམངས་ཡོངས་ཀྱི་དོགས་སེལ་ལུ།།

རྩ་ཁྲིམས་ཆེན་མོ་དགོངས་དུ་བཀུར།། གསུང་བཤད་མཐའ་གཡུས་མེད་པར་གནང་།།

བྱམས་རྩེ་ཅན་གྱི་མི་དབང་མཆོག། རྒྱལ་ཁབ་མི་སེར་ཉམ་ཆུང་དོན།།

གཞི་གསར་བཏང་བའི་ལམ་སྲོལ་བཙུགས།། ང་བཅས་རྒྱལ་པོ་ཆོས་སེམས་ཆེ།།

འཛམ་གླིང་མི་ཡི་བང་མཛོད་ནང་།། མངའ་བདག་རྒྱལ་པོ་བརྒྱ་སྟོང་ཡོད།།

སངས་རྒྱས་དངོས་དང་དབྱེར་མེད་པའི།། འབྲུག་རྒྱལ་ལྔ་པ་གཅིག་ལས་མེད།།

རིན་ཆེན་གསེར་ལས་སྒྲུབ་པའི་གསེར་ཁྲི་སྟེང་།། རང་བཞིན་ཐབས་རིག་གསར་པའི་སྐྱོང་གཞག་ལྡན།།

ལུགས་གཉིས་འཁོར་ལོ་བསྒྱུར་བའི་རྒྱལ་པོ་ལགས།། འཛམ་གླིང་ཀུན་གྱིས་བལྟ་བའི་རྒྱན་དུ་འགྱུར།།

ཆོས་རྒྱལ་འབྲུག་རྒྱལ་ལྔ་པའི་གསུངས་སྐད་འདི།། འབྲུག་མི་མ་ཚད་གཞན་གྱི་མི་སེར་ཡང་།།

རྣ་བར་གོ་ཚེ་སེམས་ལུ་དགའ་བ་འདི།། ཚད་མེད་བྱུང་དོ་ཟེར་བའི་གཏམ་ལུ་འགྱུར།།

གཞན་ལས་ཁྱད་པར་འཕགས་པའི་དགའ་སྐྱིད་དང་།། དཔལ་དང་འབྱོར་པའི་ཁྱད་ཆོས་མ་འཛོམས་རུང་།།

འབྲུག་གི་སྙན་གྲགས་ཀུན་ལུ་ཁྱབ་མི་འདི།། ས་སྐྱོང་རྒྱལ་པོ་ཁྱེད་ཀྱི་མཐུ་རྩལ་ཨིན།།

དགའ་སྐྱིད་དཔལ་འཛོམས་རྩ་བ་བཟུང་ཏེ་གིས།། དམངས་གཙོའི་རིང་ལུགས་རྩ་བ་ཆོས་བཞིན་སྐྱོང་།།

བསོད་ནམས་ལྡན་པའི་འབྲུག་པའི་མི་སེར་ཚུ།། བདེ་སྐྱིད་ཉི་མ་ཤར་བ་སེམས་རེ་དགའ།།

མི་དབང་མངའ་བདག་རྒྱལ་པོའི་སྐུ་དྲིན་ལས།། ས་འདིར་འཁྱམས་པའི་མི་སེར་ཕར་རང་བཞག།

འདི་ནང་ཡོད་པའི་དུད་འགྲོ་སེམས་ཅན་ཡང་།། སེམས་པ་སྤྲོ་སྟེ་སྐྱིད་པའི་གླུ་ལེན་དོ།།

ཚེས་ཆེན་བཅོ་ལྔའི་ཟླ་བ་ཤརཝ་ད་ལུ།། འཛམ་གླིང་འོད་ཀྱིས་གང་སྟེ་ཡོད་དོ་བཟུམ།།

ང་བཅས་མི་དབང་རྒྱལ་པོའི་བཞིན་རས་འདི།། ཕྱོགས་བཞི་ག་ལས་བལྟ་རུང་ཡོད་ཆེམ་ཆེ།།

ལུང་བསྟན་གྱི་མི་དབང་རྒྱལ་པོ་མཆོག། སྨན་ལྗོངས་ཀྱི་ལྷ་ཡི་ཞིང་ཁམས་ནང་།།

རྒྱལ་ཁབ་ཀྱི་མི་ཡི་སྲོག་ཤིང་འབད།། སྐུ་ཚེ་འདི་འགྱུར་མེད་བཞུགས་བཅུག་ཅིག།

བདེ་སྐྱིད་འདྲ་ས་མེད་པའི་སྨན་ལྗོངས་ལུ།། སྐྱོང་ཚུལ་འགྲན་མེད་གོང་ས་ལྔ་པ་མཆོག།

སྐུ་ཚེ་དཔག་མེད་ཉི་མའི་འོད་བཟུམ་སྦེ།། སྐལ་བརྒྱར་གནས་ཏེ་བཞུགས་པའི་སྨོན་འདེབས་ཞུ།།

མཇུག་བསྡུ།

རྩོམ་འདི་ལྷབ་པ་ཅིན་རྩོམ་རིག་འདི་ལས་བརྟེན་རྫོང་ཁའི་ནང་རྩོམ་བརྩམ་ཐངས་ཚུ་ཤེས་ཚུགས་པའི་རེ་བ་བསྐྱེདཔ་མ་ཚད་རྩོམ་འདི་ནང་ལུ་ང་བཅས་རའི་རྒྱལཔོ་དང་རྒྱལ་ཁབ་མི་སེར་ཚུ་གི་སྐོར་བཀོད་དེ་ཡོདཔ་ལས་ང་བཅས་ར་འབྲུག་གི་གནས་སྟངས་གི་སྐོར་ལས་ཧ་གོ་ཚུགས་པའི་སྨོན་ལམ་ཞུ།།

བསྟན་འཛིན་བདེ་སྐྱིད་ལྷུན་གྲུབ།

སྐུར་སྟོད།

གཞུང་མཁར་སྨན་སྦིས།
འགྲུལ་འཕྲིན་ཨངཿ ༡༧༤༠༧༦༡༨
lhendupt22@gmail.com