གཙང་མོ་སྙན་པའི་གླུ་དབྱངས།

གཙང་མོ་སྙན་པའི་གླུ་དབྱངས།

བུཚ། མེ་ཏོག་དཀར་སེར་དམར་ལྗང་།། གསེར་སྦྲང་བུང་བ་འཁོར་ས།།

སྐུ་གཟུགས་ལེགས་པའི་བུ་མོ།། སྟག་ཤར་གཞོན་ནུ་འཁོར་ས།།

བུམོ། འོད་ཟེར་ཅན་གྱི་ཟླ་བ།། ནམ་མཁའི་སྦུག་ལུ་འཇའ་བས།།

སྟག་ཤར་གཞོན་པའི་ཞལ་རས།། སྨན་ཆུང་མིག་ལུ་མཛེས་པས།།

བུཚ། མཐོང་ན་མིག་ལུ་མཛེས་པ།། ཉན་ན་གསུང་སྐད་སྙན་པ།།

བསམ་ན་སེམས་པ་དགའ་བ།། མཁའ་འགྲོ་དབྱེ་བ་མིན་འདུག།

བུམོ། གངས་ཀྱི་གཙང་ཆུ་སྔོན་མོ།། འཐུང་ན་ཁ་སྐོམ་སེལ་བས།།

སྟག་ཤར་གཞོན་པ་འཇལ་ཚེ།། སེམས་ཀྱི་ན་ཟུག་སེལ་སོང་།།

བུཚ། འབྲུག་གི་རྒྱལ་ཁབ་ནང་ལས།། ཞལ་མཛེས་དཀྱིལ་འཁོར་འཇལ་ཚེ།། 

དྲི་མེད་བཅོ་ལྔའི་ཟླ་བ།། ཤར་ལས་ཤར་བྱུང་དྲན་སོང་།།

བུམོ། ཕྱི་ལས་སྐུ་ཤ་དཀར་བ།། ནང་ན་ཐུགས་སེམས་ལེགས་པ།།

སྟག་ཤར་ཕྱི་གསལ་ནང་གསལ།། ཤེལ་དཀར་བུམ་པ་འདྲ་བས།།

བུཚ། དྲི་བཟང་སེམས་ཀྱི་མེ་ཏོག། ཤར་ཡང་སེམས་ལུ་ཤར་ཡོད།།

ང་ཡི་ལེགས་པའི་མེ་ཏོག། གཏན་ཀྱང་ཤར་ཏེ་བཞུགས་གནང་།།

བུམོ། སྟག་ཤར་དམ་ཚིག་ཡོད་ན།། སེམས་ཀྱི་མེ་ཏོག་རང་ཡང་།།

ཚེ་གཅིག་ལུས་ཀྱི་རྒྱན་སྦེ།། མ་འགྱུར་གཏན་ཀྱང་སྡོད་ནི།།

བུཚ། ཁྱོད་སྐུ་མེ་ཏོག་དཀར་པོ།། དྲི་མ་སྤོས་ལས་ཞིམ་པས།།

བསྐལ་པ་མ་སྟོང་བར་དུ།། ལྷ་ལུ་མཆོད་པ་ཕུལ་གེ།

བུམོ། དགའ་བའི་སེམས་རང་ཡོད་ན།། རྒྱུ་དང་ངོ་རིས་མེད་རུང་།།

མཐའ་དང་དམ་ཚིག་ཡོད་ན།། ཕན་པ་འདི་རང་འདུག་དགོ།

བུཚ། དམ་ཚིག་ཁ་དར་དཀར་པོ།། དྲི་མ་མེད་པར་མཐོང་མི།།

རྨི་ལམ་ནང་ལུ་མེན་པར།། དངོས་སུ་འབད་རང་འཇལ་ཡི།།

བུམོ། མདོག་མཛེས་གསེར་གྱི་དྲི་བཟང་།། ག་བུར་དཀར་པོའི་རྒྱན་ཆ།།

དྲི་ཞིམ་ག་བུར་ང་ཡང་།། དྲི་བཟང་ཁྱོད་ཀྱི་རྒྱན་ཆ།།

བུཚ། ཁྱོ་ནི་ག་བུར་དཀར་པོ།། ང་ནི་དྲི་བཟང་སེར་པོ།།

དམ་ཚིག་དྲི་མ་མེད་པར།། བུམ་པའི་ནང་ལུ་འཛོམས་གེ།།

བུམོ། དགའ་ནི་མཉམ་ཅིག་དགའ་རུང་།། མི་རྟག་རང་བཞིན་ཨིན་པས།།

མཉམ་ཅིག་སྡོད་པའི་དབང་ཚད།། རང་གི་ལག་པར་མིན་འདུག།

བུཚ། ཕ་རི་སྤང་གི་ཕྱོགས་ལུ།། འཇའ་ཚོན་ཁ་དོག་ལེགས་པས།།

གཏན་ཀྱང་སྡོད་དབང་མེད་རུང་།། མིག་གི་རྒྱན་སྦེ་བཞག་ནི།།

བུམོ། སྨན་ཆུང་ཁོག་པའི་ནང་ན།། སེམས་མཐུན་ཁྱོད་ཀྱི་འཛུམ་གདོང་།།

བུ་མོ་ཡལ་ན་མ་གཏོགས།། འཛུམ་གདོང་ཡལ་ས་མིན་འདུག།

བུཚ། དུང་དཀར་གཡས་འཁྱིལ་དཀར་པོ།། མཚོ་ཡི་ནང་ལུ་མི་བཞག།

དཀོན་མཆོག་ལྷ་ཁང་ནང་ལུ།། མཆོད་པའི་གླུ་དབྱང་ཕུལ་ནི།།

བུམོ། ཁྱོད་ཞལ་དཀར་གསལ་ཟླ་བ།། གླིང་གཞི་སྐོར་བ་མི་བཏང་།།

ཡ་གི་ལྷ་ཡི་ཞིང་ཁམས།། ལྟད་མོ་བལྟ་བར་འཁྱིད་ནི།།

བུཚ། ད་རིས་འཛོམས་པའི་དགའ་སྤྲོ།། སེམས་ལས་ནམ་ཡང་མི་བརྗེད།།

དོན་ཧིང་གུ་ལུ་རིས་མོ།། གཏན་ཀྱང་བྲིས་ཏེ་བཞག་ནི།།

བུམོ། རི་མོ་གསེར་གྱི་པ་ཏྲ།། སེམས་ཀྱི་གདིང་ལུ་བྲིས་ན།།

ཁ་དོག་མཛེས་པའི་དམ་ཚིག། འགྱུར་བ་མེད་པར་བཞག་གེ།

བུ་དང་བུམོ། མེ་ཏོག་མཆོད་པའི་རྫས་བཟང་།། གླུ་དབྱངས་མཆོད་པའི་སྙན་ཚིག།

དགའ་ཞིང་སྤྲོ་བའི་ངང་ལས།། དཀོན་མཆོག་གསུམ་ལུ་ཕུལ་གེ།། །།

རྫོགས་སོ།

བསྟན་འཛིན་བདེ་སྐྱིད་ལྷུན་གྲུབ།
འགྲུལ་འཕྲིན་ཨངཿ ༡༧༤༠༧༦༡༨